• ACTUALIDADE,Novas

O plan de mantemento do Concello de Malpica permitiu mellorar máis de 20.000 metros de vías municipais

O goberno municipal xestionou unha achega da Deputación para facer fronte a un investimento que supera os 226.000 euros

O Concello de Malpica de Bergantiños vén de rematar un plan de acondicionamento e mantemento que permitiu mellorar un total de 20.489 metros de vías municipais. O programa de actuación deseñouse en función das necesidades, de maneira que nalgúns casos só foi preciso acometer a limpeza das cunetas, pero na maioría leváronse a cabo tarefas de adecuación dos firmes, bacheos repavimentacións ou novas pavimentacións.

O goberno municipal de Malpica xestionou unha achega da Deputación por importe de 226.578,80 euros para poder levar a cabo o plan de mantemento, que afectou a un total de 21 tramos de vías repartidos polos lugares de Barizo, Asalo, Mens, Beo, Seia, Taraio, Aldeola, Buño, Cambre, Pedrosa, Piñeiros, Santiso, Vilarnovo e Seixas.

As intervencións foron diferentes en cada caso. A actuación realizada no núcleo de Beo, por exemplo, incluíu o derrubo dun muro para ensanchar a calzada uns dous metros, o que facilita tanto o tráfico rodado, ao permitir que circulen dous vehículos en paralelo, coma peonil. Tanto o alcalde, Eduardo Parga, como o concelleiro de Obras, Miguel Fernández, destacaron especialmente este último aspecto por tratarse dunha rúa urbana que estaba moi deteriorada e que foi totalmente pavimentada con cemento.

En Asalo asfaltáronse dous tramos, un de zahorra e outro de terra, e o primeiro tamén foi ampliado para mellorar a mobilidade. Outra das vías ensanchadas foi a de Sorrío (Seaia), onde ademais acometeuse a canalización das augas pluviais para intentar resolver as inundacións que todos os invernos afectan ás fincas e á mesma estrada. A canalización das augas foi unha actuación complementaria, así mesmo, en Leiloio, onde a pista foi ensanchada e asfaltada. En Buño as obras leváronse a cabo no límite co municipio de Ponteceso. De feito, os dous concellos puxéronse de acordo para realizar o asfaltado nos seus treitos correspondentes.

• ACTUALIDADE,Novas

Clausurado en Buño o curso de pequenos arranxos de xardinería para persoas con diversidade funcional

Os alumnos do obradoiro, impartido por Íntegro, completarán en abril os traballos de acondicionamento do xardín da praza do Cruceiro

O alcalde de Malpica, Eduardo Parga; os concelleiros de Servizos Sociais e Obras, Marisol Blanco Gorín e Miguel Fernández, e o presidente da asociación Íntegro, Adolfo López Baña, clausuraron hoxe en Buño un curso que permitiu a formación de 11 persoas con diversidade funcional para realizar pequenos arranxos de xardinería doméstica. O rexedor malpicán expresou o compromiso do goberno municipal coas iniciativas formativas que, coma neste caso, poden contribuír a mellorar o currículo dos participantes e a facilitar a súa inserción no mundo laboral. Neste sentido, o presidente de Íntegro comentou que a xardinería é nestes momentos un dos nichos de traballo que ten detectado a entidade. Adolfo López Baña avogou pola organización doutras actividades que permitan cubrir ese baleiro, e Eduardo Parga manifestou a súa disposición a colaborar nese sentido.

Neste caso, o obradoiro foi subvencionado pola Deputación Provincial da Coruña e durou algo máis dun mes. Ao longo deste tempo, os alumnos e alumnas recibiron formación teórica na Casa do Oleiro e realizaron prácticas no xardín da praza do Cruceiro de Buño. Ata alí desprazáronse hoxe os representantes do Concello de Malpica e da asociación Íntegro. Aínda que o cambio é evidente, o mal tempo impediu completar o proxecto, que quedará rematado nos vindeiros días. Ademais, a acción formativa inclúe unha segunda parte centrada no mantemento da nova área verde que se desenvolverá no mes de abril.

Miguel Álvarez, monitor do curso, destacou o traballo realizado polos alumnos e a utilización de materiais que permiten reflectir a esencia de Buño. Así, no axardinamento utilizouse grava de ladrillo, e na decoración, ánforas e outras pezas de olería. Plantas de tempada e arbustos completan a intervención realizada.

Despois da visita ao xardín, alumnos, autoridades e persoal municipal compartiron un aperitivo na Casa do Oleiro. 

• ACTUALIDADE,Novas

Os concellos de Malpica e Carballo sumaranse á demanda contra a aseguradora da empresa mineira do Monte Neme

Os alcaldes, Eduardo Parga e Evencio Ferrero, reuníronse hoxe para estudar accións conxuntas

Os alcaldes de Carballo, Evencio Ferrero, e Malpica, Eduardo Parga Veiga, mantiveron hoxe, martes 14 de outubro, unha xuntanza na Casa do Concello carballesa para falar da negativa da entidade aseguradora AXA a facerse cargo dos gastos derivados dos danos provocados pola rotura dunha balsa mineira no Monte Neme o pasado 10 de febreiro.

Os danos están cifrados en 140.758 euros e xa teñen sido abonados polos dous concellos afectados, mais ante o feito de que a aseguradora rexeite facerse cargo dos custes, barállase a opción de adoptar medidas legais, xa que a antiga concesionaria está en concurso de acredores e sinala a AXA como responsable. Así, ante a intención manifestada pola Consellería de Industria da Xunta de Galicia de interpoñer unha demanda contra AXA para que a aseguradora asuma a súa responsabilidade, esta mañá Ferrero e Parga Veiga acordaron solicitar unha xuntanza co Director Xeral de Enerxía e Minas, Ángel Bernardo Tahoces, para que os concellos tamén teñan a oportunidade de personarse nesta demanda.

Así mesmo, esperan poder estudar os posibles mecanismos que se poderían poñer en marcha para que os veciños e veciñas afectados tamén sexan quen de reclamar de forma conxunta. Hai que lembrar que a rotura dunha das tres balsas mineiras de Monte Neme orixinou unha vertedura de máis de 24.000 metros cúbicos de auga, e deixou unha greta no noiro de 10 metros de alto por catro de ancho. Máis do 70 por cento dos danos correspóndense co Concello de Malpica, no que as riadas causaron maiores danos, e o restante son danos cuantificados en Razo da Costa.

• ACTUALIDADE,Novas

Os obradoiros de lendas do Concello de Malpica chegan aos centros escolares do municipio

As xornadas de investigación dirixidas por Xosé Manuel Varela serán os días 14 e 21

Os escolares do concello de Malpica de Bergantiños converteranse nos próximos destinatarios do resultado das xornadas de investigación de lendas malpicás realizado semanas atrás por Xosé Manuel Varela nas Aulas de Lecer de Buño e Malpica. Os colexios participantes serán o CEIP Milladoiro de Malpica, o IES Urbano Lugrís de Seaia e o CEIP Xoaquín Rodríguez Otero de Buño.

A primeira cita terá lugar o vindeiro martes 14 de outubro. A partir das 12 da mañá, Varela desenvolverá no colexio Milladoiro un obradoiro con alumnado de 6° de Educación Primaria.

O seguinte encontro está programado para o martes 21 de outubro. Os obradoiros de lendas desenvolveranse ó longo de toda a xornada. Os destinatarios do pase da mañá será o alumnado de 1° e 3° de ESO do Urbano Lugrís, en dúas sesións que darán comezo ás 12.35 h. Para a xornada de tarde, os protagonistas serán os de 5° e 6° de Primaria de Buño.

Con estas catro sesións de transmisión xeracional de literatura oral, precedida por outra xa realizada no mes de maio con alumnado de 4° de ESO do Urbano Lugrís, péchanse as actividades de dinamización lingüística do presente ano e que contaron co respaldo da Secretaría Xeral de Política Lingüística. Non obstante, o próximo obxectivo será divulgar nunha publicación ilustrada estas interesantes mostras de tradición que abranguen a totalidade das parroquias do concello.

• ACTUALIDADE,Novas

Comezan as obras de reforma do parque infantil de Malpica

O proxecto ten un orzamento de preto de 100.000 euros

A sinatura da acta de replanteo, hoxe pola mañá, marca o comezo das obras de reforma e adaptación do parque infantil de Malpica, un proxecto incluido no POS 2014 que ten un orzamento de 99.792,78 euros. No parque, situado na rúa Patria Galega, reuníronse o alcalde, Eduardo Parga; o concelleiro de Obras e Servizos, Miguel Fernández; o concelleiro de Turismo, Alfredo Cañizo, un representante da empresa adxudicataria, un funcionario representante da Deputación da Coruña e a arquitecta técnica municipal directora das obras.

O proxecto ten un prazo de execución de catro meses. As obras consistirán na reforma do parque para adaptalo á normativa actual sobre parques infantís, a eliminación de elementos construtivos que poden suponer certo risco para os usuarios (bordillos, gradas, bancos de fábrica?), a reposición de pavimentos, a substitución da fonte, a reforma dos aseos e a organización das zonas de xogos por idades. Neste sentido, os que poidan ser reutilizados serán restaurados e no resto dos casos colocaranse xogos novos. Ademais, o parque será dotado con mobiliario novo.

• ACTUALIDADE,Novas

O Concello de Malpica de Bergantiños solicita a Medio Rural a cesión de fincas da masa común da parcelaria de Cerqueda

O alcalde, Eduardo Parga, reuniuse coa comisión veciñal que xestiona os terreos

O Concello de Malpica de Bergantiños solicitará á Consellería de Medio Rural a cesión dunha serie de fincas incluídas na masa común da concentración parcelaria de Cerqueda. O acordo foi adoptado nunha reunión da comisión veciñal que xestiona os terreos co alcalde, Eduardo Parga. A xunta local (integrada por representantes dos propietarios e do Concello) pode propoñer a adxudicación dunha masa común a un titular concreto para destinala a equipamentos colectivos ou outros fins de interese social, como é o caso do Concello de Malpica.

As masas comúns son fincas sobrantes despois de realizar as adxudicacións das parcelas da concentración parcelaria que, polo xeral, son entregadas aos concellos para que poida desenvolver proxectos de interese comunitario.

• ACTUALIDADE,Novas

As parroquias de Buño e Leiloio son un paraíso de lendas e tradicións

Os obradoiros organizados polo Concello de Malpica continuarán nos centros escolares

O obradoiro de lendas realizado o pasado venres 26 de setembro na Casa do Oleiro deixou patente que as xentes destas dúas parroquias conservan unha rica literatura de tradición oral. As maiores da aula de lecer estaban sobradas de recordos aprendidos dos seus antepasados. Ó longo de máis dunha hora foron debullando a mitoloxía da Eira das Meigas, da Fonte da Señora ou do Carballo de Santo Estevo, entre outras.

O mito do San Xoán pervive na parroquia de Leiloio. No cume do Monte Neme sitúase a Eira das Meigas, un espazo circular no que só medra ?herba campía? como dixo unha das informantes. Na noite de San Xoán a tradición conta que alí se xuntan as meigas da redonda para ?bailar?. Na mañá seguinte quen baila ou ?brinca? é o sol ao abrir o día. Este é o único día do ano no que os veciños o ven bailar.

A gran sorpresa da tarde foi o descubrimento do culto ás augas que aínda pervive na fonte da Señora ou de Santa María. A ela acudíase cos cativos que estaban collidos pola ?sombra? para sacárllela. Tiñan que lavalos espidos nos tres canos da fonte.

En Buño sobrevive a lenda do carballo de Santo Estevo. Marca o linde coa parroquia de Cerqueda. Ata el foi o santo nun carro pero non quixo seguir adiante e regresou a Buño, xusto ata o lugar onde se lle levantou a igrexa. A lenda deste carballo centenario conta que nunca se chegou a cortar porque se se fixese, do seu tronco brotaría sangue.

Estes obradoiros de lendas, que continuarán agora nos centros escolares, forman parte do programa de dinamización lingüística que organiza o Concello de Malpica de Bergantiños neste 2014 co respaldo da Secretaría Xeral de Política Lingüística da Xunta de Galicia.

• ACTUALIDADE,Novas

O Concello de Malpica de Bergantiños expresa a súa solidariedade coa Asociación Galega de Ataxias

O alcalde, Eduardo Parga, participou hoxe na cuestación realizada pola entidade no mercado municipal

O alcalde de Malpica, Eduardo Parga, acompañado polo concelleiro Miguel Fernández, participou hoxe na cuestación realizada no mercado municipal pola Asociación Galega de Ataxias (AGA). Con este xesto, o goberno municipal quixo expresar a súa solidariedade e o seu apoio á entidade, que conta con gran implantación no municipio.

O alcalde malpicán destacou o importante labor que desenvolve a Asociación Galega de Ataxias tanto na atención directa ao enferm@ coma na información e asesoramento tanto ás persoas afectadas coma aos seus familiares. Nese sentido, Eduardo Parga ofreceu á entidade a colaboración do Concello de Malpica.

Durante a xornada informativa, as representantes de AGA, que forma parte da Federación Española de Ataxias e da Federación Galega de Enfermidades Raras e Crónicas, repartiron trípticos nos que explican qué é unha ataxia, cales son os seus síntomas, o estado das investigacións para atopar unha cura e o labor que desenvolve a propia entidade. As persoas que desexen recabar máis datos ou colaborar con AGA poden poñerse en contacto vía mail ataxias.galicia@gmail.com ou por teléfono aos números 981 234 651, 636 779 682 ou 629 178 566.

• ACTUALIDADE,Novas

A Asociación Caldeirón organiza a primeira Rota Lugrís seguindo os pasos do pintor pola vila de Malpica

A iniciativa, que reunirá a poetas, músicos e artistas, coincide co 60º aniversario da inauguración da Casa do Pescador

A Rota Lugrís, unha iniciativa da Asociación Cultural Caldeirón que conta coa colaboración do Concello de Malpica, permitirá seguir os pasos do pintor pola vila de Malpica. Segundo explica Paco Souto, secretario de Caldeirón, despois de participar este verán na ruta organizada polo Museo do Mar de Caión, a entidade pensou na figura de Lugrís para articular un percorrido similar arredor da pintura, a música e a poesía, e todo iso coincidindo co 60º aniversario, neste mes de setembro, da inauguración da Casa do Pescador de Malpica.

Precisamente, a Casa do Pescador será o punto de partida da Rota Lugrís. A cita está sinalada para as 12.00 horas, e nese lugar celebraranse xa as primeiras actividades. Ao longo da xornada haberá pintura ao vivo en distintas localizacións da península malpicana, actuacións musicais, recitais poéticos e interesantes charlas sobre o mar, os naufraxios e o propio Lugrís. A Asociación Caldeirón conta coa participación de medio cento de artistas chegados de diferentes puntos da provincia.

Igualmente interesante é o itinerario trazado. Así, despois do primeiro acto na Casa do Pescador os participantes continuarán pola lonxa, a Atalaia, o Caldeirón, a praia e de novo a lonxa. Nese traxecto terán a ocasión de ?reabrir? o Bar da Checa, un antigo establecemento hostaleiro que frecuentaba Urbano Lugrís durante a súa estadía en Malpica e que aínda que agora é unha vivenda, conserva a súa estrutura orixinal. Os seus propietarios abrirán as portas do inmoble con este motivo tan especial, unha oportunidade única que dende a Asociación Caldeirón agradecen especialmente.

• ACTUALIDADE,Novas

O Concello de Malpica inicia as obras do parque infantil de Cambre e da mellora da accesibilidade á praza Villar Amigo

Hoxe tivo lugar a sinatura da acta de replanteo

O alcalde de Malpica, Eduardo Parga, e o concelleiro de Obras, Miguel Fernández, asistiron hoxe á sinatura da acta de replanteo de dúas obras  Concello de Malpica de Bergantiños financiadas con cargo ao Fondo Europeo de Desenvolvemento Rexional (Feder) cun orzamento de licitación de 42.358,64 euros.

Este investimento permitirá, por un lado, a construción dun parque infantil no entorno do centro sociocultural de Cambre. O novo espazo público incluirá xogos para os rapaces e as rapazas e unha cancha de baloncesto. O segundo proxecto consiste na mellora da accesibilidade á praza Villar Amigo de Malpica, onde os dous tramos de escaleiras existentes van ser substituídos por ramplas. As obras serán executadas pola empresa Construcciones Queiro, que tamén estivo representada hoxe na sinatura da acta de replanteo.