• ACTUALIDADE,Novas

Malpica inaugura a escultura “Nai Carrexeira” como homenaxe ás mulleres traballadoras do mar.

O tenente alcalde de Malpica, Alfredo Cañizo, asistiu este venres xunto coa concelleira Noelia Freijeiro e o concelleiro Miguel Ángel Fernández á inauguración de “ Nai Carrexeira”, monumento realizado por Ánxel Cao. “Estou moi orgulloso e agradecido de que Eliseo Villar Loureiro e a súa familia doasen esta bonita escultura que homenaxea moi ben o traballo das mulleres de Malpica que carrexaban o peixe para a súa venda e á súa vez coidaban aos seus fillos. A escultura está instalada nun lugar fantástico e vai ser un referente turístico por estar situada no paseo marítimo de Malpica coas Illas Sisargas e a capela de San Adrián como fondo” explicou Cañizo.

Ao acto tamén asistiu parte da corporación, o exalcalde José Ramón Varela Rey, o patrón maior Pedro Pérez Martelo e o alcalde de Malpica do Tajo, Santiago Hortas Bautista. “É un pracer a vosa invitación a asistir aos actos deste concello ó que estamos “hermanados” e máis neste acto que homenaxea á muller traballadora nas tarefas tan duras do mar. É unha escultura marabillosa que representa o que foi no seu día un traballo tan duro” dixo Santiago. Miguel Ánxo Fernández, pola súa parte, agradeceu a presenza dos asistentes e sobre todo a Eliseo Villar Loureiro a doazón da preciosa estatua. Tamén desculpou a ausencia do alcalde de Malpica, Eduardo Parga, que por razóns de axenda non puido estar presente.

O escultor Ánxel Cao explicou que é unha figura realizada unicamente para Malpica en representación da muller traballadora. Esta escultura homenaxea ás mulleres non só polo traballo que desempeñaban senón polo coidado e a educación da familia. “É unha figura realizada en bronce cun peso de 230 quilos de tamaño natural cuxa altura é un pouco maior á natural por razóns estéticas” explicou.

Pola súa banda, Eliseo Villar Loureiro, deu as grazas ao concello de Malpica por permitir doar esta obra e deixar que se situase nunha zona tan fermosa como é o paseo marítimo da vila. A súa intención de doar este monumento Nai Carrexeira é honrar a todas as mulleres que se encargaban de carrexar o peixe dende as lanchas ata os camións e á fábrica de consevas. “Elas fixeron que este pobo fora pr´ospero”.

• ACTUALIDADE,Novas

A Regata Illas Sisargas celebra a súa XXXIV edición esta fin de semana

O prazo de inscripción remata hoxe mércores ás 19:00 horas

A praia de Malpica acolle esta fin de semana a XXXIV Regata Illas Sisargas – XVII Memorial Pucho Bermúdez de Castro (e tamén en memoria dos precursores deste evento deportivo, José Luis Arcay e Juan Manuel Vázquez). 

Sábado está previsto que se celebre a Regata Inversa. Ás 11 da mañá abrirase a oficina de Regatas. A saída está prevista entre as 13:45 e as 14 horas e farase entre a baliza da Guisanda e o barco do Comité de Regata. A chegada á meta estará sinalizada por unha baliza de cor vermella situada entre a praia de Malpica e o Barco do Comité de Regatas con bandeira azul.

Xa o domingo, ás 12 da mañá farase a saída entre o barco do Comité (levará unha bandeira amarela) e unha baliza hinchable vermella. A meta estará sinalizada tamén pola baliza Guisanda.

Ás 20 horas terá lugar a recepción e entrega de premios ós gañadores da etapa Coruña – Malpica. Na competición pode participar calquera cruceiro a vela dun solo casco, cun mínimo de eslora de 6,49 metros, pero non se admiten embarcacións cun GPH superior a 780 seg/milla.

A inscripción estará aberta ata este mércores (8 de xuño) ás 19 horas. Poderanse inscribir neste enderezo web: https://www.rfgvela.es/escora/regatta/regata-illas-sisargas2022. 

• ACTUALIDADE,Novas

Manifesto de condena contra a violencia de xénero. Malpica, 31 de maio de 2022

En primeiro lugar, quero agradecer a vosa presenza nesta concentración en repulsa da violencia de xénero. Unha lacra contra a que levamos anos loitando para erradicala. Pero, moi ao noso pesar, cada día está máis presente na nosa sociedade.

Ao falar de violencia de xénero, o primeiro que vén á mente son os empurróns, os golpes ou as agresións físicas. Pero estamos equivocados, o agresor comeza sometendo a vítima aos poucos, apartándoa das súas amizades, da súa familia, controlando os seus  movementos, a súa roupa, o seu peiteado, a súa maquillaxe, as súas chamadas… Todo.

Nos primeiros seis meses do ano 2022, 17 mulleres foron asasinadas pola súa parella ou ex-parella; 1144 dende o 2003, ano no que se comezaron a recompilar estes datos. Aínda que tamén deberiamos de contabilizar as vítimas de agresións, como a acontecida na madrugada do luns en Carballo, a cal lle desexamos que se recupere pronto das graves lesións que sofre. E oxalá que pronto poida abrazar aos seus pequenos, a súa familia e amizades e comece con fortaleza unha nova vida coas súas crianzas.  Porque, cantas mulleres son vítimas de violencia de xénero realmente? Cantas mulleres permanecen caladas no anonimato por medo?   

Por iso, desde aquí pedímoslles que venzan os seus medos e se atrevan a pedir axuda  para saír do pesadelo ao que están sometidas. Lembrámoslle que poden atopar apoio profesional gratuíto no teléfono 016, enviando unha mensaxe de Whatsapp no 600 000 016 ou a través da dirección de correo 016-online@igualdad.gob.es. Aí atoparan axuda para elas e as súas crianzas, protección, e o asesoramento xurídico e psicolóxico que precisen.

Xa para rematar, queremos dicir que todos e todas os que estamos aquí presentes damos un paso adiante para condenar calquera tipo de violencia física ou psíquica e brindarlle a axuda que necesiten ás vítimas.

Moitas grazas

María Soledad Blanco Gorín

Concelleira de Servizos Sociais e Igualdade