• ACTUALIDADE,Novas

Malpica intensifica os traballos de mellora en toda a rede viaria do municipio

O Concello de Malpica redobra esforzos na conservación da súa rede de estradas e intensifica os traballos de mellora en todas as vías de titularidade municipal.

Co obxectivo de reparar os estragos ocasionados no pavimento polo uso e o paso do tempo, iniciáronse tarefas de acondicionamento do firme asfáltico e de recheo de fochancas en diversos puntos do concello. Os traballos estenderanse ó resto do termo municipal nas vindeiras semanas.

Entre as tarefas de conservación das estradas está tamén a limpeza das marxes da vía e a supervisión da sinalización vertical e das marcas horizontais. Preténdese así asegurar a seguridade na circulación tanto de vehículos como de viandantes.

Desde o goberno local consideran “unha prioridade” os traballos de mantemento nas vías públicas. “Son tarefas que levan tempo pola extensión da nosa rede de estradas, pero que resultan fundamentais para conectar todas as parroquias de Malpica e á nosa veciñanza”, destacaron.

HUMANIZACIÓN DA RÚA IGREXA

Por outra banda, a venres 23 de abril reabrirase ó tráfico peonil a rúa Igrexa, na que se están a finalizar as obras de humanización que se iniciaran a finais do mes de febreiro. No caso do tráfico de vehículos, este retomarase na terceira semana de maio.

Con esta intervención, que conta cun orzamento de arredor de 85.500 euros, sitúase ó peón como o protagonista da vía fronte ó tráfico rodado. A comezos desta semana rematouse co formigonado da rúa e só quedan pendentes pequenos retoques que se executarán nos vindeiros días.

• ACTUALIDADE,Novas

As augas de Area Maior e de Seiruga reciben a máxima cualificación da Consellería de Sanidade

As augas que bañan as praias malpicás de Seiruga e Area Maior contan coa clasificación de “excelente” para a temporada de verán do 2021. A Consellería de Sanidade, a través da Dirección Xeral de Saúde Pública, comunicoulle ó Concello de Malpica esta certificación logo de analizar a calidade das zonas de baño de ambos areais.

Tanto Seiruga como Area Maior recibiron a mellor cualificación posible dentro dos tres distintivos que outorga a Xunta de Galicia, que diferencia entre “excelente”, “boa” e “suficiente”. Coa análise da auga preténdese detectar a presenza de calquera vertido ou bacteria que poida resultar prexudicial á hora do baño.

Desde o goberno local destacaron a importancia “dos resultados a nivel sanitario e tamén no eido económico polo gran atractivo dos nosos areais de cara a chegada de visitantes”.

• ACTUALIDADE,Novas

O Concello iniciará mañá as obras de melora na capa de rodadura e sinalización na avenida Canido e na rúa Boa Vista

O Concello de Malpica comezará mañá os traballos de mellora na capa de rodadura e sinalización horizontal na avenida Canido e na rúa Boa Vista, que contarán cun importe de 27.225 euros.

Estes consistirán na aplicación dunha capa de rodadura e instalación de sinalización horizontal, que servirá para mellorar a seguridade viaria de peóns e condutores.

Obsérvanse tamén numerosos baches, así como o cuarteamento na pavimentación. Estas anomalías serán subsanadas para o correcto mantemento das mesmas. Nas tarefas previas, limparanse as cunetas nos espazos de tránsito, realizarase o bacheo pertinente e incrementaranse a profundidade das arquetas, tapas, sumidoiros e outros elementos das redes no pavimento.

O goberno local incide na “relevancia destas intervencións para solventar o
estado do firme nestas dúas vías, e incrementar así a seguridade viaria, algo
prioritario para nós.”

• ACTUALIDADE,Novas

O proxecto “Aprende a través del surfing” chega aos centros educativos de Malpica para ensinar á rapazada a relacionarse entre sí e co medio

Os centros educativos de Malpica de Bergantiños recibiron a pasada semana as primeiras sesións encadradas no proxecto “Aprende a través del surfing”, que chega para ensinarlle á rapazada a mellorar as relacións entre sí, ademais de co medio ambiente, especialmente co mar.

As sesións tiveron lugar no CRA Nosa Señora do Faro; no CEIP Joaquín Rodríguez Otero e no CEIP Milladoiro, e continuarán nas vindeiras, nun proxecto que se estenderá ata as 5 semanas e onde o colofón serán as sesións prácticas nos areais malpicáns.

Nesta iniciativa, que conta coa colaboración do Concello de Malpica, preténdese vencellar os valores propios do surf á educación regrada, como son a igualdade e a inclusión.

A idea primordial é inculcar a cultura deste deporte marítimo para abranguer situacións como o coñecemento das mareas ou familiarizarse ca contorna, espazos “que temos sempre de man pero que non sempre empregamos como deberiamos”, recalca David Blanco, responsable do proxecto.

Desenvólvese a través dunha plataforma virtual, primordialmente para rapazas e rapaces de infantil e primaria, durante 5 semanas, e a experiencia final será nas praias de Malpica.

“A nosa idea, á vez que promovemos a iniciativa, é que colla forza a idea da Reserva local de Surf”, di Blanco. “Malpica conta cun potencial moi grande e cunhas características moi especiais que fan as súas praias espazos moi singulares para a práctica deste deporte.”

A concelleira de Educación e Medio Ambiente, María Álvarez, destacou a importancia de “trasladarlle á rapazada a relevancia que ten para todas e todos o bó trato cara o medio ambiente, e si ademais isto é posible grazas a unha iniciativa tan orixinal, pois benvido sexa!”

• ACTUALIDADE,Novas

Malpica retoma a actividade cultural con obras de teatro e a inauguración dunha exposición nas rúas do municipio

O Concello de Malpica retoma a actividade cultural prevista para o mes de novembro. Logo da mellora da situación sanitaria e do levantamento das restricións, o municipio acollerá ao longo do mes de marzo distintas representacións teatrais nas instalacións do Centro Cívico, ademais dunha nova edición do Certame de Poesía Erótica e da entrega de premios do concurso ‘Rúa dos Contos’.

A concellería de Cultura organiza o próximo 6 de marzo na Praza do Campo un acto para galardoar ás persoas premiadas no certame de microrrelatos ‘Rúa dos Contos’, celebrado nos meses de abril e maio do ano pasado. O evento comezará ás 12:00 horas e só poderán acudir as e os vencedores do concurso. Servirá tamén para inaugurar unha exposición pública dos traballos participantes.

Ese mesmo día, ás 19:00 horas, terá lugar un novo Certame de Poesía Erótica ‘Illas Sisargas’, que este ano cumpre a súa XV edición. A compañía Aldaolado, pola súa banda, marcará o reinicio das representacións culturais no Centro Cívico coa súa obra ‘Epístola ás neofalantes’.

O día seguinte, 7 de marzo, o pano volverase abrir a partir das 18:00 horas, con Tarabela Creativa escenificando ‘Tabú’, de Carmen Conde, e que servirá para conmemorar o Día Internacional da Muller. O domingo 14 de marzo, á mesma hora, será a quenda do Teatro da Ramboia con ‘O meu mundo non é deste reino’. A última actuación do mes, programada para o 21 de marzo ás 18:00, estará a cargo de Producións Teatrais Excéntricas, que deleitará ao público con ‘Medida x Medida’.

As persoas interesadas en acudir deberán solicitar previamente as entradas chamando ao Departamento de Cultura, no 981 707 104, ou ao Concello, no 981 720 001.  Lembramos a importancia de cumprir coas medidas vixentes en materia sanitaria, co uso obrigatorio de máscara dentro e fóra do recinto, o mantemento da distancia de seguridade e empregando o xel hidroalcólico que se porá a disposición do público. O aforo estará limitado ao 30% para garantir a seguridade das espectadoras e dos espectadores.

“Facemos un chamamento á responsabilidade individual agora que o contexto nos acompaña. Non podemos baixar a garda, xa que o incumplimento das medidas suporía un retroceso na situación”, achegan desde o Concello.

• ACTUALIDADE,Novas

O Concello e a Asociación de Hostalaría de Malpica buscan dinamizar o sector coa axuda da Deputación da Coruña

O Concello e a Asociación de Hostalaría de Malpica traballan conxuntamente na dinamización do sector, un dos máis castigados pola crise sanitaria da covid-19. A agrupación, constituída a principios deste ano, busca que todos os negocios do municipio progresen conxuntamente no eido económico e formativo.

Con ese obxectivo, representantes de ambas organizacións mantiveron esta mañá un encontro na Deputación da Coruña con Antonio Leira, titular de Economía, Facenda e Persoal. Nunha xuntanza de carácter orientativo e de asesoramento, desde a asociación consultaron a viabilidade dunha serie de propostas coas que reactivar e potenciar a súa actividade económica.

Unha vez formada, a asociación pode optar a subvencións coas que sufragar, por exemplo, cursos formativos para os seus traballadores ou outras accións conxuntas de promoción. Na actualidade, a Asociación de Hostalaría de Malpica está formada por máis de 60 negocios de todo o municipio.

Desde o goberno local destacan “a disposición da Deputación da Coruña á hora de ofrecer asesoramento a unha agrupación que pode dinamizar enormemente a actividade económica do noso municipio”. Do mesmo xeito, agradeceron a “vontade de cooperación da Asociación de Hostalaría co Concello”, xa que “ambas organizacións buscamos que Malpica e a súa veciñanza progrese en todos os ámbitos”.

• ACTUALIDADE,Novas

O Concello de Malpica concede 116.000 euros en axudas a 65 autónomos e microempresas do municipio

O Concello de Malpica emitiu a resolución definitiva das axudas, por un valor total de 116.000 euros, que recibirán 65 autónomos e pequenas empresas do municipio. Estas subvencións encádranse dentro do programa PEL-Reactiva da Deputación Provincial da Coruña, que pretende impulsar a recuperación e o emprego nos municipios con menos de 50.000 habitantes.

Deste xeito, as persoas e entidades beneficiarias recibirán contías que oscilan entre os 1.500, 2.000, 2.500 e 3.000 euros. O obxectivo básico desta medida é sufragar os seus gastos máis inmediatos antes as restricións e consecuencias da pandemia que en moitos casos obrigaron ao cese da súa actividade.

As empresas e autónomos e autónomas ás que se lle concederon as axudas terán de prazo ata o 31 de marzo do 2021 para xustificar os gastos a financiar. Entre estes está a compra de material antiséptico ou desinfectante; os arrendamentos de maquinaria, vehículos, locais ou instalacións; a adaptación de locais ás medidas de protección fronte á covid-19; seguros de responsabilidade civil ou de accidentes e subministración de auga, gas, combustibles e electricidade.

Desde o goberno local destacaron “a importancia deste tipo de axudas para promover a reactivación do tecido empresarial de Malpica logo do enorme esforzo que supuxo para moitos negocios ter que suspender a súa actividade por mor da situación sanitaria”.

Neste sentido, agradeceron a colaboración “tanto da veciñanza como das persoas á fronte das empresas, que respectaron as fortes restricións e que están facendo posible que a incidencia do virus no municipio se reduza día a día”.

A relación de solicitudes concedidas pódese consultar en https://bit.ly/3uAAYLy.