O Boletín Oficial do Estado recolle o real decreto 703/2020, do 28 de xullo, polo que se aproban as bases reguladoras das axudas á paralización temporal da actividade pesqueira para poder facer fronte ao impacto económico e social derivado da pandemia da COVID-19. Estas axudas convócanse para o primeiro tramo do exercicio 2020 e modifícanse distintos reais decretos relativos ás regulacións das organizacións profesioais no sector da pesca e a acuicultura e para o exercicio da pesca recreativa.
O Concello de Malpica e a Asociación Oleira de Buño prepáranse xa para a segunda volta de Buño deMostra, que arrincará mañá, xoves día 6, e que se prolongará ata o domingo, 9 de agosto. Durante eses días, as persoas participantes no evento poderán gozar de música, pasacalles, roteiros e demostracións en vivo dos oleiros e oleiras.
O obxectivo, tal e como explica a concelleira de Olería, Leticia Varela, non é outro que “pór en valor o traballo que estes artesáns e artesás realizan ao longo de todo o ano. A COVID-19 impídenos celebrar o evento como noutras edicións, pero é fundamental que sigamos apostando pola olería, un dos elementos máis representativos do municipio”.
Co fin de garantir a seguridade do público asistente, estableceuse un protocolo con medidas de prevención que deberán respectarse en todo momento. Así, o emprego da máscara será obrigatorio e as persoas deberán manter, a maiores, a distancia de seguridade.
A programación comezará mañá, xoves 6 de agosto ás 19.00 horas, co pasacalles de música tradicional a cargo de Arrancadeira. Malante tomaralles o relevo o venres, 7 de agosto ás 19.00 horas, tamén cun pasacalles de ambientación musical.
As actividades continuarán o sábado, 8 de agosto ás 10.00 horas, cando terá lugar a ruta de olería “O ciclo de vida dunha peza”, a cargo de Volta Montana –para tomar parte nesta iniciativa será necesario retirar a entrada previamente-. Ás 13.00 horas Malante & Carcaxía ofrecerán unha actuación musical, ás 19.00 horas, será a quenda de Ukestra do Medio + Dkalminha como parte do proxecto Orballo Cultural –haberá que retirar a entrada previamente-. A maiores, entre as 12.00 e as 13.00 e as 17.00 e as 18.00 horas, as persoas asistentes poderán coñecer, de primeira man, o traballo dos oleiros e oleiras a través de dúas demostracións na rúa.
A xornada de peche será o domingo, 9 de agosto. Ese día, o programa dará comezo ás 10.00 horas coa organización dun segundo pase da ruta “O ciclo da vida dunha peza” con Volta Montana. O calendario de actividades continuará co desenvolvemento de novas demostracións por parte dos profesionais da olería (de 12.00 a 13.00 e de 17.00 a 18.00 horas). Buño deMostra pechará a súa oferta ás 13.00 horas no Forno da Costa, coa actuación da banda Monoulious DOP como parte de Orballo Cultural –previa retirada da entrada-.
O goberno municipal de Malpica ten, como unha das súas prioridades, levar a rede de saneamento de todo o concello e, por suposto, a mellora e correcta explotación das infraestruturas actuais. Para conseguilo, o alcalde do Concello de Malpica, Walter Pardo, acompañado polo concelleiro de Servizos, Alfredo Cañizo, reuniuse coa Directora Xeral de Augas de Galicia, Teresa Gutiérrez.
O encontro serviu para abordar a necesidade de coñecer a situación actual da rede existente do municipio. Neste sentido, o elevado número de tramos con rede unitaria presentes na vila fai que o funcionamento da depuradora sufra debido as puntas de caudal nos episodios de chuvia. Co fin de solucionar esta situación, arrancouse o compromiso por parte de Augas de Galicia de levar a cabo o inventario total da rede. Estes traballos de inspección, revisión e inventariado da rede comezarán este mesmo outono.
Así mesmo, conseguiuse que os especialistas revisen a depuradora de Buño e de Seaia para optimizar o seu funcionamento e evitar vertidos.
Malpica acollerá o Campeonato Gallego de Fotografía Submarina ‘I Trofeo Illas Sisargas’, unha iniciativa coa que se busca pór en valor a biodiversidade e a riqueza do fondo mariño. A proba está organizada polo Club Buceo Malpica en colaboración coa Federación Galega de Actividades Subacuáticas –FEGAS- e co Concello de Malpica.
A proba, que se disputará o domingo 9 de agosto, é a única puntuable nesta tempada para a clasificación para o Campionato de España de Fotografía Submarina –NAFOSUB 2020-. O campionato arrincará arredor das 8.30 horas no espigón do porto malpicán.
As persoas interesadas en participar poderán anotarse ata o 26 de xullo. Para facelo, deberán enviar a seguinte documentación, dispoñible na páxina web da FEGAS: preinscrición e copia dixital do DNI, titulación de buceo, licencia federativa da competición, certificado médico, documento de Protección de Datos e unha declaración responsable. Estes documentos poderán remitirse a través de fegas@fegas.net, imagen@fegas.net ou buceomalpica@hotmail.com.
As augas das praias de Seiruga e Area Maior obteñen a cualificación de excelente por parte da Consellería de Sanidade da Xunta de Galicia. Esta clasificación sanitaria é vixente para a tempada de baño 2020.
Imaxe da praia de Seiruga, en Malpica | Concello de Malpica
O alcalde, Walter Pardo, destacou a ‘relevancia de obter tan bos resultados en dous dos nosos areais, nun municipio no que nos caracterizamos tamén pola beleza das nosas praias’, sinalou o rexedor.
Desde a praia de Area Maior pódese contemplar as Illas Sisargas | Concello de Malpica
Cabe lembrar que o Sergas pon a disposición da cidadanía o seguinte apartado dentro do seu portal web, https://www.sergas.es/Saude publica/Praias , onde se poden consultar os datos de maior relevancia nas praias e zonas de baño a nivel galego.
O Concello de Malpica, a través da concellaría de Cultura, comezou a planificación cultural de verán cos ‘Seráns na Rúa’ e logo da proxección do filme ‘María Solinha’ a comezos deste mesmo mes.
Así, desde a administración malpicá ofértase un amplo abano de posibilidades culturais, que comezarán o vindeiro sábado, 18 de xullo con ‘A gran viaxe’ de Iventi Teatro na rúa Eduardo Vila Fano.
O 25 de xullo, o Día de Galicia, haberá un pasarrúas con ‘A danza dos paxaros’ a cargo de Urdime, e agosto comezará no seu primeiro día coa obra de Ghazafelhos ‘A illa sen tesouro’, na rúa Eduardo Vila Fano.
O 8 de agosto, darase cita na praza do Campo O Cardume, de Xarope Tulú e o 15 de agosto, Mamá Cabra executará o ‘Eu cociño, ti cociñas?’ na rúa Eduardo Vila Fano. O penúltimo espectáculo correrá a cargo de Magín Blanco o 22 de agosto con ‘Magín Blanco e a banda das apertas’ e pechará este ‘Seráns na Rúa’ o 29 de agosto co pasarrúas de Fantoches Baj, ‘O folión do Zampón’.
As actuacións serán todas ás 20:30 horas e en caso de choiva serán trasladadas ao Mercado Municipal ou ao Centro Cívico, segundo o formato de actuación. Manteranse en todo momento os protocolos hixiénico-sanitarios e os aforos completaranse por estrita orde de chegada.
O alcalde, Walter Pardo, sinala o enorme ‘esforzo de toda a área de Cultura por achegar actividades á veciñanza. Hai que ter precaución pero isto non é incompatible con gozar dun novo formato de divertimento’, apuntou.
Pola súa banda, a concelleira de Cultura, Leticia Varela, anota que ‘seguimos apostando pola cultura en formatos máis reducidos, e seguiremos gozando de contidos de calidade con responsabilidade’, finalizou.
O Concello de Malpica, a través da concellaría de Deportes, propón para agosto un campamento de patinaxe para a rapazada de 3 a 12 anos. A primeira quenda celebrarase do 3 ao 7 de agosto, e a segunda do 10 ata o 14 do mesmo mes. En total, hai dispoñibles 20 prazas, que se poderán formalizar nas oficinas municipais do Concello. Esta actividade desenvolverase en horario de 10:00 a 13:00 horas, aínda que si é preciso será ampliado de 9:30 a 13:30 horas. Gardaranse estritamente todos os protocolos de seguridade e hixiene pertinentes, e haberá a disposición das rapazas e rapaces xel hidroalcólico.
O Concello de Malpica intensifica estes días os traballos de limpeza e desbroce ao longo de todo o termo municipal, logo do adiamento que supuxo o contexto sanitario provocado pola COVID-19.
‘Ás tarefas que levamos realizando desde hai varias semanas incorporarase unha cuadrilla de dez integrantes que se adicará a adecentar as zonas de maior concorrencia’, apunta o concelleiro de Servizos e Agro, Alfredo Cañizo.
Imaxe dun dos vehículos efectuando os traballos | Concello de Malpica
Dentro deste plan de actuacións, cóntase que tanto núcleos rurais como zonas urbanas queden preparados nun período de dez a quince días. Estase actuando tanto na contorna das praias, áreas de ocio, bordes das estradas e camiños. Para estas tarefas, disponse de ata catro tractores, que traballan por todos os lugares de Malpica.
‘Todos sabemos das necesidades que ten Malpica, e por iso decidimos darlle un impulso a estes traballos’, sostén o edil de Servizos e Agro, Alfredo Cañizo.
O alcalde, Walter Pardo, quixo ‘agradecer a paciencia da veciñanza, xa que estes traballos non puidemos acometelos coa rapidez que nos gustaría, pero nas vindeiras semanas contamos coa celeridade da que non puidemos dispoñer pola crise da COVID-19’, apuntou.
Mañá comezan os socorristas
Por outra banda, mañá, sábado 11 de xullo, comezarán a traballar as persoas que integran o servizo de Salvamento e Socorrismo da praia de Area Maior.
La Asociación Cultural Caldeirón convoca, en colaboración con el Concello de Malpica, el XV Certame de Poesía Erótica Illas Sisargas.
Se establece un premio único de 1.000 euros y la publicación de la 1ª edición de la obra en la colección Illas Sisargas de la Editorial Caldeirón.
El plazo de admisión de originales finaliza el domingo, 19 de septiembre de 2020 a medianoche. Las personas interesadas en participar podrán enviar sus textos por correo electrónico en formato PDF a la dirección premio@caldeiron.org.
Este sitio utiliza cookies para mellorar a experiencia do usuario - Ocultar detalles
• Social media Facebook, Twitter e outras Redes Sociais precisan utilizar cookies para recoñecerte.
• Analytics Os datos recollidos polas cookies de Google Analytics son anónimos e só se usan para valorar a experiencia do usuario no nosa web.
• Anuncios Este sitio pode albergar publicidade propia, de afiliados, ou de redes publicitarias.
• Cookies propias Este sitio utiliza cookies propias para facilitar o acceso e mellorar a navegación e experiencia ao usuario Aviso Legal ACEPTOLeer más
Galego
Castellano
