Novas – Páxina 71 – Concello de Malpica de Bergantiños

6Mar 2018

ACTUALIDADE,Novas

“A igualdade tamén é cousa nosa”: homes de Malpica dan a cara no Día da Muller

Desde a Concellería de Servizos Sociais e Igualdade queremos implicar a toda a sociedade na conquista da igualdade, e por iso este ano son os homes os que se poñen no lugar das mulleres cun simbólico mandil e que dan a cara para proclamar que “A igualdade tamén é cousa nosa”. O empresario e cociñeiro Óscar Souto Ures, o oleiro Fernando Cambón Cambre, o gandeiro e concelleiro Julio José Vila Díaz, o mariñeiro Luis Veiga Veiga, os futbolistas Ricardo Cotelo e David Dourado, o tenente de alcalde Miguel Ángel Fernández Mirás e o alcalde, Eduardo Parga Veiga, representan aos homes de Malpica nun cartel que está a repartirse esta semana polo concello.

O cartel, polo seu simbolismo, forma parte da propia programación que se desenvolverá no Día Internacional da Muller. A conmemoración comezará ás 11.00 horas no CEIP Joaquín Rodríguez Otero cunha solta de globos de cor violeta en lembranza de todas as mulleres vítimas de violencia de xénero.

Ás 13 horas, no Centro Cívico de Malpica, procederase á inauguración da exposición Mans creativas, unha mostra de artesanía coa que queremos poñer en valor o traballo artístico e creativo de mulleres do noso concello como as oleiras Lola Faya Puñal, Carmen Regueira Ordóñez, Carmen Isabel Labrador Fariña, Marilá Gómez Caamaño e Dolores Martínez Villar, a oleira e xoieria Ana Visos e as redeiras das asociacións Mar da Illa e O Fieital.

O acto inaugural está aberto a toda a poboación. Comezará cunhas breves intervencións da concelleira de Servizos Sociais e Igualdade, Marisol Blanco Gorín, e o alcalde, Eduardo Parga Veiga, e rematará cun aperitivo.

Ler máis

2Mar 2018

ACTUALIDADE,Novas

Persoas con diversidade funcional da Costa da Morte fórmanse en Buño nun curso de Acondicionamento de mobiliario urbano e xardíns

A Casa do Oleiro de Buño acolle un curso de Acondicionamento de Mobiliario Urbano e Xardíns no que participan veciños e veciñas do municipio de Malpica xunto a outros alumnos/as de diversas localidades da Costa da Morte. Esta nova acción formativa, impartida pola asociación Íntegro e a empresa de economía social MáisPorvir, está dirixida a persoas con diversidade funcional para mellorar a súa capacitación profesional e favorecer así a súa inserción laboral. No acto de inauguración estiveron presentes o alcalde de Malpica, Eduardo Parga Veiga; a concelleira de Servizos Sociais, Marisol Blanco Gorín; o primeiro tenente de alcalde, Miguel Fernández; a xerente de MáisPorvir, Sandra Caamaño, e a traballadora social do Centro de Recursos de Nantón, Sandra Reimúndez.

Unha vez máis o Concello de Malpica reafirma o seu compromiso con colectivos en situación de vulnerabilidade apostando pola súa formación. Nesta ocasión, a concellería de Servizos Sociais mostrou a súa colaboración a través da cesión dun aula destinada á formación teórica de doce persoas con diversidade funcional. Así mesmo, ao longo do obradoiro, que se prolongará ata o 15 de xuño, os alumnos/as tamén poderán desenvolver as sesións prácticas en diferentes áreas verdes e zonas axardinadas do municipio.

O clases levaranse a cabo de luns a venres, de 9:30 a 14:30h. A formación teórica consistirá na realización dun módulo específico de xardinería, carpintería e competencias transversais á que seguirá a correspondente posta en práctica en diferentes localizacións do municipio.

Esta acción formativa está subvencionada pola Fundación ONCE e co-financiada por Íntegro e o Fondo Social Europeo (FSE).

Ler máis

23Feb 2018

ACTUALIDADE,Novas

O goberno municipal de Malpica aborda co vicepresidente da Xunta distintas necesidades do noso concello

Entrevista con Alfonso Rueda

O alcalde de Malpica, Eduardo Parga Veiga, e o primeiro tenente de alcalde, Miguel Fernández, mantiveron unha xuntanza co vicepresidente da Xunta de Galicia para trasladarlle distintas necesidades do noso concello. Alfonso Rueda, que tamén é conselleiro de Presidencia, Administracións Públicas e Xustiza, amosouse receptivo ás propostas dos representantes do goberno malpicán, relacionadas, fundamentalmente, coa mellora de instalacións municipais e do servizo de Protección Civil.

Ler máis

16Feb 2018

ACTUALIDADE,Novas

O Concello de Malpica leva investidos nos últimos meses máis de 140.000 euros na ETAP para mellorar o abastecemento de auga

O alcalde de Malpica, Eduardo Parga Veiga, xestionou coa Xunta de Galicia un investimento de 57.995 euros que se destinaron á renovación de bombas na estación de tratamento de auga potable (ETAP). As bombas xa están en funcionamento, como puideron comprobar o propio alcalde e o concelleiro de Obras e Servizos, Miguel Fernández. Este investimento, financiado pola empresa pública Augas de Galicia, permitirá optimizar o funcionamento da instalación.

A renovación das bombas na ETAP de Ponte Berrón complementa outro investimento de preto de 85.000 euros que permitiu reformar o cadro de control para a automatización da planta, e a instalación de equipos de control dos niveis de cloro, ph, temperatura e presión nos depósitos de Pedra Queimada, Nariga e Papeiras. Todos eses datos están agora automatizados e son enviados á ETAP para poder controlalos desde a estación central.

Ler máis

14Feb 2018

ACTUALIDADE,Novas

O alcalde de Malpica recolleu hoxe na Estrada un desfibrilador cedido pola Xunta para o servizo municipal de Protección Civil

O alcalde de Malpica, Eduardo Parga, acompañado por voluntarios do servizo municipal de Protección Civil, desprazouse hoxe a sede da Academia Galega de Seguridade Pública, na Estrada, para recoller un desfibrilador cedido pola Xunta de Galicia coa finalidade de mellorar os equipos de resposta ante unha emerxencia.

No acto participaron o vicepresidente da Xunta, Alfonso Rueda, e o conselleiro de Sanidade, Jesús Vázquez, que fixeron entrega dun total de 157 desfibriladores a corpos de bombeiros comarcais, GES e Protección Civil. O vicepresidente da Xunta fixo fincapé na importancia da cooperación, colaboración e coordinación entre todas as Administracións nun eido tan importante como son as emerxencias, que redunda directamente na seguridade e no benestar da cidadanía. O conselleiro de Sanidade remarcou que Galicia foi pioneira en España no desenvolvemento de estratexias de cardioprotección, e hoxe, fóra do ámbito sanitario, hai un total de 2.161 desfibriladores e 17.750 persoas capacitadas para utilizalos. Segundo Vázquez, grazas a eles as unidades do 061 conseguen reanimar a unha media de 700 vítimas ao ano e trasladar con vida ao hospital a un 40%.

En Malpica este será o segundo desfibrilador co que contaremos para a atención inmediata a posibles emerxencias. O outro equipo atópase dispoñible nas dependencias da Policía Local e no verán está ao servizo do equipo de salvamento e socorrismo nas praias.

Ler máis

10Feb 2018

ACTUALIDADE,Novas

Presentación do equipo do novo servizo de limpeza viaria, adxudicado ao centro especial de emprego Aspaber por 2 anos

O centro especial de emprego Aspaber resultou adxudicatario do servizo de limpeza viaria para os próximos dous anos por un importe de 82.031,49 euros. Francisco Costa, Dolores Fernández e José Luis Villar, en representación de Aspaber, desprazáronse ata Malpica para presentar, xunto co alcalde, Eduardo Parga, e o concelleiro de Obras e Servizos, Miguel Fernández, o equipo humano e técnico da concesión.

O servizo de limpeza está integrado por un mínimo de 4 persoas e dispón, entre outros medios materiais, de hidrolimpadora, equipo soprador, carriño porta-caldeiros de limpeza e desbrozadora. As súas funcións xerais consisten na limpeza de rúas, prazas e paseos da vila, incluíndo o varrido, baldeo e desatasque de tragantes, así como na eliminación de maleza en pavimentos. Tamén lle corresponde o baleirado de sumidoiros ou rexiñas, a limpeza de papeleiras, a eliminación de herbas nos alcorques, a limpeza e retirada de excrementos da vía pública, o baldeo de rúas ou a limpeza de vías e espazos onde se celebren festas nas distintas parroquias.

Nos labores de varrido manual os operarios deberán prestar unha atención especial aos espazos nos que se sitúen os contedores, os accesos aos colexios, as zonas nas que haxa bancos ou mobiliario público e aquelas nas que se acumulen residuos de calquera tipo.

Ademais desas tarefas xerais, o contrato inclúe outros traballos puntuais, entre os cales figuran a limpeza de solares municipais, a retirada de chicles da vía pública, a eliminación de pintadas ou as limpezas extraordinarias en caso de accidentes ou de fortes choivas ou desprendementos de terra. Tamén figura un apartado específico para o mercado dos sábados, no que o servizo de limpeza realizará o varrido, baldeo, soprado e baleirado de papeleiras. Os ríos de lavar, por exemplo, limparanse 3 días ao ano; a Fonte Vella de Malpica, 8 veces no ano; os parques infantís, unha vez ao mes, e as áreas de ocio, tres veces ao ano.

O centro especial de emprego Aspaber renova a súa vinculación co Concello, xa que dende mediados do ano 2013 levaba desenvolvendo tarefas de limpeza viaria en Malpica. O alcalde expresou a súa satisfacción por poder seguir contando con Aspaber, non só polo bo facer que ten demostrado, senón tamén porque este novo contrato permite ao Concello de Malpica seguir materializando o seu compromiso coa integración laboral das persoas con discapacidade.

Ler máis

5Feb 2018

ACTUALIDADE,Novas

O presidente da Xunta pon o parque eólico de Malpica como exemplo da enerxía eólica máis eficiente

O presidente da Xunta, Alberto Núñez Feijoo, considera que o parque eólico de Malpica demostra que é posible “facer unha enerxía eólica máis eficiente, porque produce máis enerxía con menos infraestrutura, e menos invasiva, xa que o número de aeroxeradores redúcese nun 90%”. Este luns, precisamente, Alberto Núñez foi testemuña do remate das obras de repotenciación do parque de Pemalsa, que, malia reducir de 69 a 7 o número de aeroxeradores, producirá o dobre de enerxía, un aspecto no que incidiron tanto o presidente da Xunta como o alcalde de Malpica, Eduardo Parga.

O alcalde foi o encargado de abrir o acto, ao que asistiron tamén os rexedores de Ponteceso e Chantada; o delegado territorial da Xunta na Coruña e o conselleiro de Industria, ademais de directivos do grupo Elecnor, que ten unha participación do 95,55% no parque a través da súa filial de desenvolvemento e explotación de enerxía eólica, Enerfín. Eduardo Parga destacou que os avances tecnolóxicos permitíronnos entrar na vangarda das enerxías renovables hai 20 anos, coa instalación dun dos primeiros parques eólicos de Galicia e de España, e que hoxe volven a situar a Malpica á vangarda con este proxecto de repotenciación. “Para nós –manifestou- é un motivo de satisfacción que Malpica volva a estar na vangarda, tanto a nivel de producción como desde o punto de vista paisaxístico e ambiental”.

Na mesma liña, o presidente da Xunta aseverou que este proxecto conxuga un triplo compromiso: co ambiente, cunha redución do número de aeroxeradores, que pasan de 69 a 7; coa industria das renovables, xa que este é o segundo parque que se repotencia en Galicia, reducíndose a infraestrutura pero non a potencia nin a eficiencia enerxética, e cos concellos de Malpica e Ponteceso, xa que, ademais dun investimento de 22 millóns de euros durante a súa execución, fixa industria e emprego.

“En definitiva, estamos a falar dun parque que manterá a décima parte dos aeroxeradores, que duplicará a súa produción de enerxía equivalente ao consumo eléctrico de 18.500 fogares, e que diminuirá nunha hectárea a superficie total ocupada”, dixo, incidindo na aposta da Xunta pola repotenciación para renovar a flota de aeroxeradores instalados en Galicia, buscando un equilibrio entre a sustentabilidade ambiental e a eficiencia da eólica galega.

Ler máis

26Xan 2018

ACTUALIDADE,Novas

Julio José Vila Díaz, do PP, e Sergio García Villar, do PSOE, tomaron posesión como novos concelleiros en Malpica

A corporación municipal de Malpica volve a estar ao completo tras a toma de posesión dos novos concelleiros do PP e o PSOE no pleno ordinario do xoves 25 de xaneiro.

Julio José Vila, primeiro pola dereita

O popular Julio José Vila Díaz substitúe no grupo de goberno a Iago Espasandín Varela, que presentou a súa renuncia por motivos laborais, ao igual que o seguinte na lista, Gabriel Costa García. O novo edil non asume polo momento ningunha área de goberno. Das concellerías de Urbanismo e Deportes, das que se ocupaba Iago Espasandín, encargaranse Álvaro Carril Rodríguez, no primeiro caso, e polo alcalde, Eduardo Parga Veiga, no segundo, tal como informou o propio rexedor no pleno tras a preguntas da oposición.

No grupo mixto tamén houbo relevo. O socialista Sergio García Villar incorporouse á corporación en substitución de Isabel Loureiro Varela, que dimitiu o pasado mes de novembro por motivos persoais e profesionais, pero estivo presente no pleno deste xoves, nesta ocasión entre o público.

O novo concelleiro socialista, coa súa compañeira do BNG no grupo mixto

Ademais da toma de posesión dos novos concelleiros, a corporación debateu sobre as taxas pola utilización do ximnasio municipal, que o goberno pretende reabrir o antes posible. A proposta quedou sobre a mesa para un estudo máis detallado. Os rogos e preguntas da oposición completaron a sesión, na que a corporación non estivo ao completo pola ausencia dunha concelleira de AIM.

Ler máis

25Xan 2018

ACTUALIDADE,Cultura,Novas,Uncategorized

Mikaela, Madamitos, Faustino, Farruco, bailes, concursos, doces e unha chea de propostas máis para vivir o Entroido

O Entroido é unha das festas grandes do noso concello, e por iso tanto o Departamento de Cultura como o tecido asociativo e a hostalaría traballamos man a man para ofrecervos o mellor programa posible. Así, un ano máis presentamos un Entroido cheo de propostas para todos os públicos que nos converterán nunha das referencias das celebracións en toda Galicia.

Comezaremos o venres 9 co pasarrúas do alumnado do CEIP Milladoiro a partir das 10.30 horas e o concurso de disfraces que se celebrará a partir das 24.00 horas polos pubs da vila, que un ano máis terán preparadas cestas de lacóns e chourizos para os mellores. E remataremos o día 18, despois de moitos días de troula coa Mikaela, os Madamitos e Ghuardineros, o Faustino, o Farruco, os concursos, os doces, as festas infantís, os bailes e tamén os cocidos.

Para que todo isto sexa posible contamos coa implicación dos pubs Jofra, Submarino, Brebaxe, O Patio, Prisma e Don Paco, así como de todas estas entidades: Asociación Cultural Malante, ANPA Ventorrillo, ANPA do CEIP Joaquín Rodríguez Otero de Buño, Asociación de Redeiras Mar da Illa, Asociación Cultural Carcaxía, A.C.D. San Xulián, A.V. C. S. O Brizo, Asociación Cultural Raigañas, Asociación de Amigos da Mikaela, A. VV. De Leiloio e Asociación de Amas de Casa.

A continuación detallamos o programa de actividades:

Venres de Entroido, 9 de febreiro

En Malpica

Pasarrúas do CEIP MILLADOIRO, a partir das 10.30 h.
Concurso de Disfraces de Entroido, a partir das 24.00 horas polos pubs da vila. Cestas de lacóns e chourizos para os mellores disfraces. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan os pubs: Jofra, Submarino, Brebaxe, O Patio, Prisma e Don Paco.

Sábado de Entroido, 10 de febreiro

En Seaia

Festa de Disfraces Infantil con inchable e merenda saudable con doces de entroido sen gluten, a partir das 16.30 h. na Casa da Cultura de Seaia. Colabora: A. C. Carcaxía.

En Leiloio

Festa infantil con inchables a partir das 17.00 h. na Casa dos Veciños de Leiloio. Colabora: Asociación de Veciños de Leiloio.
Desfile de disfraces infantil e de adultos a partir das 20.30 h. seguido do Concurso de Doces para rematar con actuación dun Dj. Organiza: Asociación de Veciños de Leiloio.

En Malpica

Concurso de Disfraces de Entroido, a partir das 24.00 horas polos pubs da vila. Premios en metálico para os mellores disfraces: 1º Premio 250,00 €, 2º Premio 150,00 € e 3º Premio 100,00 €. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan Pubs: Jofra, Submarino, Brebaxe, O Patio, Prisma e Don Paco.

Domingo de Entroido, 11 de febreiro

En Malpica

Desfile de Disfraces Infantil, Percorrerá a vila saíndo do Centro Cívico ás 17.30 h. e rematando na Praza Villar Amigo. Organiza: Asociación Cultural Malante.
Actuación da Charanga NBA polas rúas da vila, a partir das 17.30 horas.
Nos pubs da Vila, daranse Doces de Entroido a partir das 17.00 h. Organizan pubs: Jofra, Submarino, Brebaxe, O Patio, Prisma e Don Paco.
Concurso de Comparsas do Entroido polas principais rúas da vila de Malpica a partir das 17.30 horas. Cestas de Entroido para as mellores comparsas. Entrega de premios a partir das 19.00 horas na Praza Villar Amigo.
Concurso de piñatas do Entroido na Praza Villar Amigo a partir das 18.00 horas. Entrega de premios ás 19.30 horas. Colaboran: A. C. Malante e C. Carcaxía.
Baile Social de Disfraces de Maiores e Concurso de disfraces para maiores das 20.00 h. ás 23.00 h no Auditorio do Centro Cívico amenizado polo Duo D´Café.

Luns de Entroido, 12 de febreiro

En Buño

Festa de Disfraces Infantil con inchables, chocolatada e degustación de doces de Entroido das 16.30 h. ás 19.30 h. no Pavillón Polideportivo do CEIP Joaquín Rodríguez Otero. Colabora: ANPA do CEIP Joaquín Rodríguez Otero.
Concurso de Disfraces Infantil ás 19.30 h. no Pavillón Polideportivo do CEIP Joaquín Rodríguez Otero. Premios ós mellores disfraces. Organiza: ANPA do CEIP Joaquín Rodríguez Otero.

Martes de Entroido, 13 de febreiro

En Malpica

Festa de Disfraces Infantil con inchables (rapaces/as ata 14 anos), no Pavillón Polideportivo de Malpica das 17.00 ás 20.00 horas. Colabora: ANPA Ventorrillo.
Concurso Gastronómico de Doces do Entroido, a partir das 15.30 h., no Pavillón Polideportivo de Malpica. Fallo do xurado e degustación ás 19.00 horas. Colaboran: Asoc. de Redeiras Mar da Illa, Asoc. de Amas de Casa e ANPA Ventorrillo.

Inscrición: No Departamento de Educación e Cultura ou en calquera das entidades colaboradoras.

Sábado de Piñata, 17 de febreiro

En Buño

A partir das 13.00 h. Sesión Vermú da Mikaela a cargo da Orquestra JERUSALÉN. Con pulpería e churrasquería no campo da festa.
A partir das 14.00 h. Degustación de cocido en todos os Restaurantes de Buño.
A partir das 17.00 h. Mikaeliña Infantil con inchables e chocolatada para os máis novos.
A Mikaela sairá ás 16.30 horas do Restaurante Canta la Rana percorrendo todos os bares e tabernas de Buño. Ás 22.30 h. queima da Mikaela e a partir das 23.00 h. actuación da Orquestra JERUSALËN e ó remate de festa con Disco Mobil, no aparcamento do Restaurante Casa Elias. Organiza: Asociación de Amigos da Mikaela.

Domingo de Piñata, 18 de ebrero

En Cerqueda

Percorrido dos Madamitos e Ghuardineros pola parroquia acompañados por unha comitiva de Entroido. Saída ás 15.00 h. itinerario: Os Resios, O Ceán, FIlgueira, As Cortes, Cerqueda, Leduzo e as Pozacas. Organizan: A.C. Raigañas.

En Vilanova

Festa de Disfraces Infantil e degustación de doces do Entroido a partir das 16.30 h. na Escola Unitaria de Beo. Colabora: A.V.C. S. O Brizo.

En Seaia

Cocido do Farruco e Faustino, para todos/as os/as participantes no Enterro do Farruco e o Faustino imprescindible asistir disfrazado. No Restaurante O Esqueiro a partir das 15.00 h. Inscricións no propio restaurante ou no Super MM até o xoves 15 de febreiro. Prezo: 15.00 € adultos e 10 euros os nenos. Organiza: A.C.D. San Xulian.

Actuación da Charanga MEKANIKA polas rúas de Seaia, a partir das 16.30 horas.

Enterro do Farruco, sairá en procesión ás 16.30 horas do Restaurante O Esqueiro percorrendo as rúas de Seaia. Xuntarase co seu curmán o Faustino no Centro Cívico e o acompañará ata o porto. Organiza: A.C.D. San Xulián.

En Malpica

Actuación da Charanga MEKANIKA polas rúas da vila, a partir das 17.30 horas.
Enterro do Faustino, que sairá do Centro Cívico ás 17.30 horas para percorrer as rúas da vila. Organiza: Asociación de Redeiras Mar da Ila.

Sábado 24 de febrero

En Cerqueda

Cocido de Entroido, no Restaurante Cantalarrana ás 22.00 h. Prezo: 20,00 € socios, 25,00 € non socios e 15,00 € nenos/as menores de 12 anos. Inscricións antes do mércores día 15 no Malpica Cen, no Centro Sociocultural das Pozacas (só os sábados) e nos teléfonos: 608 669201, 634 723 139, 638 673 057 e 698 173 659. Organiza: A. C. Raigañas.

Ler máis

24Xan 2018

ACTUALIDADE,Novas

Eduardo Parga asinou o contrato do servizo de recollida do lixo por 455.000 euros para os vindeiros catro anos

O alcalde de Malpica, Eduardo Parga, asinou hoxe o contrato do servizo de recollida e transporte dos residuos sólidos urbanos coa empresa Servizos dos Concellos Galegos SL. O noso concello destinará un total de 455.293,97 euros a xestión do lixo durante os vindeiros catro anos, prazo inicial de duración do contrato, que poderá ampliarse por dous anos máis.

O contrato asinado hoxe, nun acto no que tamén estivo presente o concelleiro de Obras e Servizos, Miguel Fernández, ten como finalidade a recollida dos residuos e o seu posterior traslado a planta de transferencia de Ponteceso, así como a limpeza e a conservación dos colectores e o mantemento dun inventario actualizado dos mesmos. A empresa debe aportar como medios materiais un camión de recollida de carga traseira, un dumper autocargable ou vehículo similar, un camión lava-contedores e unha hidrolimpadora. En canto aos medios humanos, o equipo de traballo estará composto por dous condutores, tres peóns e un encargado a xornada completa ou parcial. A maiores, e sen custe para o concello, cada ano achegará 15 soportes para colectores.

Segundo a oferta presentada, Servizos dos Concellos Galegos comprométese tamén a recoller a diario os residuos dos colectores das praias durante os meses de xullo e agosto, e na segunda quincena de xuño e a primeira de setembro tamén pero o día da ruta.

Ler máis